Nalilito na ako. Di lang isang dakot ang dami ng nakapagpapalito sa akin. Di lang isang milya ang layo ng pang-unawa sa kung ano ang katotohanan o sa kung ano ang dapat kong malaman. Di lang sampung kilo ang bigat ng nagpapagulo sa aking damdamin. Di lang isang daang dangkal na ideya ang pumapasok sa isip ko.
Kung minsan, naghahanap tayo ng kasagutan sa mga pangyayari pero ayaw nating natatanong sa mga bagay na tingin natin ay kailangang manatiling lihim...nakatago at sadyang kinakalimutan. O marahil, naghahanap tayo ng mga tao na mapagkakatiwalaan pero sadyang wala o hindi ka pa handa.
Pilit kong binubuo ang mga dapat kong sabihin. Pilit kong isinusulat nang maayos ang nais kong iparating. Ngunit malabo na yatang maayos ang mga bagay.
